ماہرین کے مطابق ناشتہ بادشاہ کی طرح کرو، دوپہر کا کھانا کسی شہزادے کی طرح اور رات کا کھانا ایک غریب آدمی کی طرح کھاؤ یعنی کم کھاؤ۔ یہ پرانی کہاوت آج کے سائنسی تحقیقات کے بعد اور بھی زیادہ معنی رکھتی ہے۔

سائنس کا نیا شعبہ ‘کرونو نیوٹریشن’ بتاتا ہے کہ صحتمند غذا کا تعلق صرف اس بات سے نہیں کہ ہم کیا کھاتے ہیں بلکہ اس بات سے بھی ہے کہ ہم کب کھاتے ہیں۔ ہمارے جسم کی اندرونی گھڑی، جسے ‘سرکیڈین ردھم’ کہتے ہیں، خوراک کو ہضم کرنے کے طریقے اور مجموعی صحت پر گہرا اثر ڈالتی ہے۔

سائنسی تحقیقات سے معلوم ہوا ہے کہ دیر سے کھانا کھانے سے بلڈ شوگر پر منفی اثرات مرتب ہوتے ہیں۔ 2022 کے ایک مطالعے میں 800 سے زیادہ بالغ افراد کو شامل کیا گیا۔ نتائج سے معلوم ہوا کہ سونے سے صرف ایک گھنٹہ پہلے کھانا کھانے والوں میں بلڈ شوگر کی سطح نسبتاً بلند رہی اور جسم نے انسولین کم بنائی۔

اس کی ایک بڑی وجہ میلاٹونن ہارمون ہے جو سونے کے وقت بڑھ جاتا ہے۔ جب میلاٹونن کی سطح بلند ہوتی ہے تو جسم کی گلوکوز کو کنٹرول کرنے کی صلاحیت متاثر ہوتی ہے۔

تحقیقات سے معلوم ہوا ہے کہ دیر سے کھانا کھانے والے افراد کو اگلے دن زیادہ بھوک محسوس ہو سکتی ہے۔ اس کی وجہ یہ ہے کہ دیر سے کھانے سے لیپٹن نامی ہارمون کی مقدار کم ہو جاتی ہے جو دماغ کو بتاتا ہے کہ پیٹ بھر چکا ہے۔

اس کے علاوہ دیر سے کھانا کھانے کی صورت میں جسم چربی کو جلانے کے بجائے زیادہ ذخیرہ کرتا ہے، جس کی وجہ سے صحتمند وزن برقرار رکھنا مشکل ہو سکتا ہے۔

فرانس میں ایک لاکھ سے زائد افراد پر ہونے والے ایک مطالعے کے مطابق دیر سے ناشتہ کرنے والے افراد میں دل کی بیماریوں کا خطرہ زیادہ پایا گیا۔ محققین نے یہ بھی دیکھا کہ شام کو جلد کھانا کھانے اور صبح وقت پر ناشتہ کرنے سے حاصل ہونے والے فاقے کا لمبا دورانیہ آپ کی قلبی صحت سے منسلک ہے۔

ہر کسی کا اپنا کرونوٹائپ ہوتا ہے۔ کچھ لوگ فطری طور پر صبح جلد بیدار ہونے والے ہوتے ہیں جبکہ کچھ رات گئے تک جاگنے والے ہوتے ہیں۔

صبح جلدی اٹھنے والے افراد میں انسولین کے مؤثر ہونے کا وقت نسبتاً جلد ہوتا ہے اور میلاٹونن بھی جلد خارج ہوتا ہے۔ اس کے برعکس رات کو سرگرم رہنے والے افراد دیر سے کھانے کی وجہ سے بلڈ شوگر میں خرابی اور وزن بڑھنے کے زیادہ خطرے سے دوچار ہو سکتے ہیں۔

ماہرین کے مطابق ہمیں اپنی فطری عادات کو مدنظر رکھتے ہوئے بتدریج رات کے کھانے کے اوقات جلدی کرنے کی کوشش کرنی چاہیے۔

نیند کا دورانیہ اور معیار بھی بھوک اور کھانے کی خواہش پر اثر انداز ہوتا ہے۔ اگر ہماری نیند پوری نہ ہو تو زیادہ کھانے اور زیادہ توانائی والی غذاؤں کے انتخاب کا امکان بڑھ جاتا ہے، جو وقت کے ساتھ وزن میں اضافے کا باعث بن سکتا ہے۔

شام کے کھانے میں ایسے غذائی اجزا شامل کیے جا سکتے ہیں جو بہتر نیند میں مدد دیتے ہیں، مثلاً خشک میوہ جات اور بیج وغیرہ۔

چکن، سالمن اور ٹونا جیسی غذائیں جن میں ٹرپٹوفان زیادہ مقدار میں پایا جاتا ہے، نیند کے معیار کو بہتر بنانے میں مددگار ثابت ہو سکتی ہیں۔